Пуш уйăхĕн 20-че районти Культура çуртĕнче Чăваш Республикин Президенчĕн Н.Федоровăн «Ырă ĕçсен çулталăкĕ» тата Раççей президенчĕн В.Путинăн «Çемье çулталăкĕ» Указĕсене халалласа пысăк уяв йĕркелерĕç. Ку мероприятине 9 ял тăрăхĕ хутшăнчĕ. Уявра нумай ачаллă, нумай ача усрава илнĕ, спортпа туслă, ырă ĕçсем тăвакан, нумай çул пĕрле пурăннă çемьесене саламларĕç.Районти тĕп библиотека ĕçченĕсем «Чин умай вулакан çемье» номинацине хутшăнса кĕнеке нумай вулакан Сергеевсен çемьине саламларĕç, парнепе чысларĕç.
    Сергеевсем – Мария Федоровна тата Геннадий Сергеевич – Красноармейски салине 1975 çулта ĕçлеме килнĕ, Геннадий Сергеевич районти милиции начальникĕн çумĕнче, Мария Федоровна ял советĕнче ĕçленĕ. 4 ача пăхса çитĕнтернĕ: пĕр ывăлпа 3 хĕр. Сергеевсен çемьи 33 çул библиотекăна кĕнеке вулама çÿрет, кĕнеке ачисен, мăнукĕсен пурнăçĕнче те пысăк вырăн йышăнать, пурте вулама юратаççĕ. 70 çултан иртнĕ пулин те эрнере пĕрре çĕнĕ литературăпа паллашма кĕрсе тухаççĕ. Геннадий Сергеевич – ветеран хорĕн участникĕ. Уявра вĕсене район администрацийĕн пуçлăхĕн çумĕ Антонов Н.И. тав сăмахĕпе чысларĕ.

Аслă Отечественнăй вăрçăра вут-хĕм юлашки хут ялкăшнăранпа, Мускав çийĕн Çĕнтерÿ салючĕ çиçсе çĕкленнĕренпе 65 çул çитсе пырать. Пирĕн çĕршыв хăйĕн кирек хăш çитĕнĕвĕпе çĕнтерĕвне паллă тунă чухне те 1941-1945 çулсенче Тăван çĕршыв ирĕклĕхĕпе никама парăнманлăхне хÿтĕлеме çапăçу хирне тухнă паттăрсене – тĕнче историйĕнче чи аслă çĕнтерÿсенчен пĕрне туптанă паттăрсене – ĕмĕр-ĕмĕр манма пултараймĕ.

Тăван çĕршывăн 1941-1945 çулсенчи Аслă вăрçинче çĕнтернин обществăпа политика тата истори пĕлтерĕшне шута илсе, Чăваш Енĕн чи лайăх ывăлĕсемпе хĕрĕсен паттăрла ĕçне тивĕçлипе хак парса Чăваш Республикин Президенчĕн Указĕ тухрĕ – «Тăван çĕршывăн 1941-1945 çулсенчи Аслă вăрçинче Çĕнтерÿ тунăранпа 65 çул çитнине уявлама хатĕрленесси тата ирттересси çинчен». Çавна май, никама та , нимĕне те манас мар тесе, вăрçă паттăрĕсене çĕнĕрен аса илсе, çĕре кĕнисене ырăпа асăнса, хамăр хушăра пурăнакансене сума суса тĕп библиотекăра тата ялти библиотекăсенче тĕрлĕ мероприятисем ирттерме хатĕрленеççĕ. Тĕп библиотекăра ятарлă виçĕ çуллăх «Пусть живые запомнят и пусть поколения знают » Программă хатĕрленĕ